قصتنا
بلشت حكايتنا لما كنا بندوّر على فنجان إسبريسو مرتب في العقبة، وكان الموضوع دايمًا صعب. جرّبنا كتير مقاهي، حتى اللي بالفنادق الخمس نجوم، وكل مرة كانت القهوة يا محروقة ومحمصة زيادة، أو عبارة عن مي مش قهوة.
بس خلال سفراتنا، اكتشفنا إن بكل مدينة في بالعالم في ناس بيحبوا قهوتهم عن جد، وبيلاقوا أماكن بتعمل قهوة مختصة بنَفَس محلي وطابع خاص. ومن هون سمعنا عن موجة جديدة اسمها الموجة الثالثة من القهوة – أسلوب جديد بيحترم القهوة، من الزرعة للكوب.
دخلنا هاي الموجة من حبنا للقهوة، وبلشنا نسافر ونتعلم من ناس عندهم شغف حقيقي: باريستا، أصحاب محامص، ومهووسين بالقهوة. ومن هون فهمنا إن القهوة مش وصفة، هي رحلة، وكل يوم فيها تعلم جديد.
اتواصلنا مع منظمة القهوة المختصة (SCA)، وصرنا محمّصين معتمدين ومتخصصين بالقهوة.
شغفنا نوفرلك أحسن تجربة قهوة ممكنة. عشان هيك، بنينا محمصة ومختبر قهوة في قلب مدينتنا العقبة، وبنقضي وقتنا هناك بتذوّق وتحميص أجود أنواع البن الأخضر الطازج لمقهانا في شارع السعادة.